Яқинда актриса Асал Шодиева хонандалик билан шуғулланиши ҳақида маълум қилинган эди, энди бошқа бир таниқли ижодкор ҳам камерани микрофонга алмаштирмоқчи кўринади. 

Зарина Низомиддинова Сарвар ва Комил дуэти билан ҳамкорликда ўзининг биринчи қўшиғини куйлаб, унга клип суратга олишга ҳам улгурди. Зарина учун хонандалик янгилик дейиш нотўғри. Сабаби, у ўз ижодини қўшиқ куйлашдан бошлаган. Дадаси "Ялла” гуруҳининг собиқ вакили, Ўзбекистонда хизмат кўрсатган артист Шаҳбоз Низомиддинов билан бир неча бор дуэт қўшиқлар куйлаган. Янги "Афсонавий” деб номланган қўшиқ унинг, актрисаликдан кейинги илк қўшиғи ҳисобланади.

Актрисанинг илк видео ролигини клипмейкер Нозим Жумаев суратга оляпти. Сюжет йўналишидаги клип тез кунларда эътиборингизга тақдим этилади.

Аввалига Шахзода Муҳаммедова, кейин эса, Асал Шодиева, мана энди Зарина ҳам хонанда сифатида фаолиятини бошлади. Навбатдаги ким экан?   

Қизиқ, бу актрисаларга теккан "вирус”нинг бир турими ёки улар кимўзар ўйинини ўйнашяптими? Нима бўлганда ҳам уларга омад тилаймиз.